Okkur vantar aðstoð við skipulagningu og framkvæmd mótmælanna við Nordica Hotel þann 15. Maí. VIð lýsum eftir hverjum þeim sem getur orðið að liði. Hér eru nokkur atriði sem okkur vantar hjálp við. Hafið samband ef þið viljið: baratta@visir.is

Uppákomur: Við viljum helst hafa sem fjölbreyttasta dagskrá og þess vegna lýsum við eftir einstaklingum eða hópum sem vilja og sjá sér þess fært að troða upp með tónlist, dansi, ræðuhöldum, ljóðaflutningi, gjörningum eða öðrum hætti. Hafa ber í huga að það er ekki víst að við náum að setja upp hljóðkerfi og því er best ef fólk verður þess viðbúið að troða upp rafmagnslaust.

Matur: Við hvetjum alla til að mæta með mat og drykk (óáfengan). Við verðum með grill og prímus, en ef margir mæta, þá er ekki víst að við verðum með nóg pláss fyrir alla og því væri gott ef fleiri gætu mætt með eldunargræjur. Við munum bjóða upp á dýrindis grænmetissúpu og það væri frábært ef fleiri gætu séð sér fært að koma með mat sem þeir vildu deila með öllum sem taka þátt.

Hljóðfæri og aðrar græjur: Við erum að reyna að koma okkur upp hljóðkerfi og hljóðfærum. Bæði þarf að vera sem allra best aðstaða til að spila tónlist og halda ræður, en einnig þurfum við að vopna alla mótmælendur með einhverjum hávaðagræjum. Hugmyndin er jú sú að koma skilaboðunum inn á fundinn og til þess þarf mikinn hávaða. Endilega mætið með ýlur og hrossabresti, trommur og lúðra, potta og pönnur....

Auglýsingar: Það mætir enginn ef þetta er ekki auglýst. Nú þurfa allir sem vilja hjálpa okkur að birta þetta á vefsíðum sínum, gera dreifimiða og plaköt, stensla og límmiða og segja frá þessu sem víðast.

Skilti og borðar. Það vantar fullt af skiltum og borðum með slagorðum. Allir sem vettlingi geta valdið eru beðnir um að smíða, mála og sauma. (Kannski verðum við með vinnustofu þegar nær dregur).

Notið ímyndunaraflið og sjáið hvort þið getið orðið að liði.